मुलुकको विकास गर्न सक्ने शिक्षाको आवश्यकता छ : अर्थमन्त्री डा. गुरुङ

२०८२ कार्तिक २९, शनिबार मा प्रकाशित २ हफ्ता अघि

लमजुङ–गण्डकी प्रदेश सरकारका आर्थिक मामिला मन्त्री एवं प्रवक्ता तथा नेपाली कांग्रेस लमजुङका सभापति डाक्टर टकराज गुरुङले सक्षम नागरिकलाई विदेशिनबाट रोक्न सकेमा मात्रै मुलुकको विकास हुने बताउनुभएको छ ।

लमजुङको राइनास नगरपालिका-९, कुडुँलेमा रहेको जनता माविको हिरक महोत्सवलाई आज सम्बोधन गर्नुहुँदै मन्त्री गुरुङले यस्तो बताउनुभएको हो ।

जीविकोपार्जनका साथै विभिन्न अवसरको खोजीमा गाउँघर छोडी शहर र विदेशिने क्रम बढेको बताउँदै देशमा उत्पादित दक्ष, सक्षम जनशक्ति र श्रमशक्तिलाई देशमै बस्ने वातावरण सिर्जना गर्न सकेमा मात्रै मुलुकको विकास हुने उहाँले बताउनुभएको हो ।

‘गाउँबाट शहर बसाइ सर्ने क्रम बढ्दो छ । त्यसैले गाउँमा रहेका सामुदायिक विद्यालयमा विद्यार्थीको संख्या घट्दो छ । साथै देशमा रहेका दक्ष जनशक्ति, श्रमशक्ति पनि विदेश पलायन भइरहेको छ । यसले मुलुकको विकास कदापी हुँदैन,’ कार्यक्रमका प्रमुख अतिथि समेत रहनुभएका डाक्टर गुरुङले भन्नुभयो, ‘त्यसैले जनशक्तिलाई मुलुकभित्रै बस्ने वातावरण सिर्जना गर्नुपर्छ । राज्यले उचित आर्थिक नीति, कार्यक्रम, योजना बनाइ जनशक्तिलाई उपयुक्त ढंगले प्रयोग गर्न सक्नुपर्छ ।’

विकासको सम्भावनाको खोजी गरी उपलब्ध श्रोत–साधनको उचित तवरले उपयोग गरी मुलुकको विकास गर्न सक्ने शिक्षा आजको आवश्यकता रहेको उहाँले उल्लेख गर्नुभयो । ‘यसै अनुसारको शिक्षा नीति हुनुका साथै कार्यान्वयन हुनु जरुरी छ,’ उहाँले थप्नुभयो ।

यसैगरी, आफु यसै क्षेत्रको भएकाले जनता माविको समग्र विकासका लागि सदैव सहयोग गर्ने उहाँले प्रतिबद्धता व्यक्त गर्नुभयो । हिरक महोत्सवकै अवसरमा सर्वप्रिय गायक राजु परियार, गायिका चीजा गुरुङ र गायक प्रशान्त तामाङको विशेष सांगीतिक प्रस्तुती समेत रहेको थियो ।