प्रस्तावित ‘६१ मेघावाटको मस्र्याङ्दी–३ हाइड्रोपावर’का विषयमा प्रभावित क्षेत्रका स्थानीयबीच छलफल

२०८२ मंसिर ६, शनिबार मा प्रकाशित १0 महिना अघि

लमजुङ–मस्र्याङ्दी नदीमा प्रस्तावित ६१ मेघावाटको मिनि मस्र्याङ्दी हाइड्रोपावर (मस्र्याङ्दी–३)का विषयमा आज पाउँदीमा स्थानीय र सरोकारवालाबीच छलफल भएको छ ।

लमजुङको सुन्दरबजार नगरपालिका वडा नं ७ र ९, राइनास नगरपालिका वडा नं ६, ८ र भानु नगरपालिका वडा नं ९ र १० भएर बहने मस्र्याङ्दी नदीमा प्रस्तावित ६१ मेघावाटको मिनि मस्र्याङ्दी हाइड्रोपावर (मस्र्याङ्दी –३)का विषयमा जनप्रतिनिधि, राजनीतिक दलका प्रतिनिधि र प्रभावित क्षेत्रका स्थानीयबीच छलफल भएको हो ।

सुन्दरबजार नगरपालिका वडा नं ७ का वडाअध्यक्ष जयराम रेग्मीको संयोजकत्वमा बसेको भेलाले प्रस्तावित मस्र्याङ्दी–३ हाइड्रोपावरकोे यथार्थ विवरण सुन्दरबजार नगरपालिका र राइनास नगरपालिका तबाट नेपाल विद्युत प्राधिकरण, विद्युत विकास बोर्डसंग बुझी मंसिर मसान्तभित्र स्थानीय जनतालाई जानकारी गराउने निर्णय भएको राइनासका अगुवा राजकुमार पाण्डेले जानकारी दिनुभयो ।

यहाँ अत्यधिक मानव बस्तीका साथै अन्त्यष्ठी घाट, धार्मिक महत्वका स्थानहरु रहेका र जलविद्युत केन्द्र निर्माण हुँदा यहाँ पर्यावरणीय असर पर्नुका साथै जल पर्यटनको समाप्ति हुने भएकाले यस कार्यलाई रोक्नुपर्ने स्थानीय अगुवा राइनास हर्राबोटका कृष्णराज ओलियाले बताउनुभयो ।

भेलामा सुन्दरबजार नगरपालिकाका नगर प्रमुख कृष्णप्रसाद कोइराला, राइनास नगरपालिकाका उप-प्रमुख पुष्पराज खनाल, राइनास नगरपालिका–६ का वडाअध्यक्ष गोविन्द चिलवाल लगायत सुन्दरबजार नगरपालिका, राइनास नगरपालिका र तनहुँ भानु नगरपालिकाका स्थानीयको उपस्थिति रहेको थियो ।

हाइड्रोेपावरका साथै कानुनी प्रकृया बुझेर नागरिकलाई जानकारी गराउने र नागरिकको चाहनाअनुसार नै आफुहरु अघि बढ्ने जनप्रतिनिधिहरुले बताएका छन् ।