गण्डकी प्रदेशले भुकम्प प्रभावितलाई सहयोगका लागि १ करोड रुपैयाँ दिने

२०८० कार्तिक १९, आईतबार मा प्रकाशित २ साल अघि

गण्डकी प्रदेशले जाजरकोट केन्द्रबिन्दु भएर गएको भूकम्पका प्रभावितहरुलाई सहयोग गर्न कर्णाली प्रदेश सरकारलाई १ करोड रुपैयाँ उपलब्ध गराउने भएको छ ।

आइतवार बिहान बसेको मन्त्रिपरिषद्को बैठकले भूकम्प पीडितको खोज, उद्धार तथा राहतका लागि गण्डकी प्रदेश सरकारको तर्फबाट कर्णाली प्रदेश सरकारलाई एक करोड रुपैयाँ सहयोग गर्ने निणर्य गरेको हो ।

‘भूकम्पले कर्णाली प्रदेशमा ठूलो मानवीय र भौतिक क्षति भयो । एउटा प्रदेशका नागरिकलाई विपद् पर्दा अर्कोले सहयोग गर्नुपर्छ भनेर हामीले एक करोड रुपैयाँ दिने निर्णय गरेका हौँ,’ गण्डकी प्रदेशका मुख्यमन्त्री सुरेन्द्रराज पाण्डेले भन्नुभयो ।

शुक्रवार राति भूकम्प गएको र शनिवार बिहानै भूकम्प प्रभावितको उद्धार र उपचारमा प्रदेश सरकारले औषधिसहित विशेषज्ञ चिकित्सकको टोली पठाइएको मुख्यमन्त्री पाण्डेले बताउनुभयो ।

मन्त्रिपरिषद् बैठकले भूकम्पका कारणले ज्यान गुमाएका कर्णालीवासी नागरिकप्रति हार्दिक श्रद्धाञ्जली व्यक्त गर्दै शोक सन्तप्त परिवारजनमा गहिरो समवेदन र घाइतेको शीघ्र स्वास्थ्य लाभको कामना समेत गरेको छ ।

भूकम्प पीडितको उद्धार र उपचारमा गण्डकी प्रदेश सरकारले औषधिसहित विशेषज्ञ चिकित्सकको टोली शनिवार नै कर्णाली प्रदेशको भूकम्प प्रभावित क्षेत्रमा पठाएको थियो ।