मनकारी सेलिब्रेटी : बाढी प्रभावित थलोमा पुगी राहत वितरणमा जुट्दै

२०८३ भाद्र १५, सोमबार मा प्रकाशित ५७ मिनेट अघि

सेलिब्रेटी तथा कलाकारले भोढेकोशी बाढीबाट प्रभावित थलोमा पुगेर आफै राहत सामग्री वितरण गर्न थालेका छन् । मिस नेपाल दीपमाला ढकालदेखि गायक दुर्गेश थापा, अभिनेता पल शाह अहिले बाढी प्रभावित नुवाकोटमा छन् ।

दीपमालाले हामी नेपाल संस्थासँगको सहकार्यमा अहिले नुवाकोटका विभिन्न स्थानमा पुगेर राहत सामग्री बाँडेकी छन् । उनले राहत सामग्री लिएर आफू विभिन्न क्याम्पमा पुगेको बताएकी छन् । पीडितलाई मात्र होइन, उद्वारकर्तालाई पनि आवश्यक रेनकोट र बुट जरुरी रहेको उनको भनाइ छ ।

गायक दुर्गेश थापाले नुवाकोटको विदुर लगायतका थलोमा पुगेर प्रभावितलाई खानेकुरा, लत्ताकपडा बाँडेका छन् । उनले आफै भात पस्किएर बाढी पीडितलाई खाना पनि खुवाएका छन् ।

अभिनेता पल शाहले नुवाकोटको विदुर नगरपालिकास्थित पिपलटारका ४०० घरपरिवारलाई राहत बाँडेको जनाएका छन् । २०० घरलाई सिरक, डसना, तन्ना र बाँकी २०० घरलाई भित्री वस्त्र, पछ्यौरी, चाउचाउ, विस्कुट, जीवनजल र स्यानिटरी प्याड बाँडेको जनाएका छन् ।

अभिनेत्री प्रियंका कार्कीलाई आफूकहाँ प्राप्त हुन आएका लत्ताकपडा र डोनेसनलाई अहिलेसम्म राहत सामग्री पुग्न नसकेका थलोमा वितरण गर्ने तयारी भएको जनाएकी छन् । उनले राहत सामग्रीका भिडियो सेयर गरेकी छन् ।

र्‍यापर भियोमाले पनि नुवाकोटको विदुरमा पुगेर राहत बाँडेका छन् । गायक एकदेव लिम्बुले एक भ्यान राहत सामग्री वितरण गरेका छन् । उनले प्रभावित क्षेत्रमा पुगेर तरकारी बाँडेका छन् ।

‘आफ्नो तर्फबाट सकेको सानो सहयोग गरेर फर्किँदा मनमा छुट्टै आनन्द महसुस हुने रहेछ’ लिम्बुले लेखेका छन् । गायिका समीक्षा अधिकारी जिल्ला प्रशासन कार्यालय कास्कीमार्फत रसुवा बाढीका पीडितका लागि राहत सामग्री प्रदान गरेको जनाएकी छन् ।

कन्टेन्ट क्रिएटर इभा गिरीले पनि प्रभावित थलोमा पुगेर राहत सामग्री वितरण थालेकी छन् । इन्स्टाग्राममा भिडियो पोस्ट गर्दै उनले औषधि, खाद्यान्न, लत्ता कपडा लगायतका सामग्री प्रदान गर्न लागेको जनाएकी छन् ।

गोसाइकुण्ड दर्शनमा पुगेकी अभिनेत्री ऋचा शर्माले त्यहाँ अड्किएका सर्वसाधारण विशेष गरि महिला र बालबालिकालाई लत्ताकपडा जरुरी भएकाले डोनेसन दिन आग्रह गरेकी छिन् । यीबाहेक, अन्य कलाकारले प्रधानमन्त्री दैवीप्रकोप उद्वार कोषमा गच्छेअनुसार रकम प्रदान गरेको जनाएका छन् ।