बेलैमा धान भित्र्याउन नपाउँदा किसान समस्यामा : तोरी, दलहन र आलुबालीमा पनि असर

तनहुँको भिमाद नगरपालिका–५ बुढुवाफाँटस्थित थन्क्याउने बेला बर्सातले खेतमै भिजेको धान । बेमौसमी वर्षाले किसानलाई समस्या पारेको छ । तस्बिर ः मिला दरै÷रासस

२०८२ कार्तिक १५, शनिबार मा प्रकाशित १0 महिना अघि

असारमा रोप्ने बेला पानी नपरेर समस्यामा परेका किसानले अहिले कात्तिकमा पानी पर्दा धान भित्र्याउन पाएका छैनन् । धानको बोटमै बाला टुसाउन थालेको किसानको गुनासो छ । पाँजा खेतमै भिजेको छ । आफ्नो ६ महिनाको मेहनत खेर जाने चिन्ताले किसानलाई सताइरहेको छ । कतिपयले काटेर राखेको धानलाई चुटेर भित्र्याउन सकेका छैनन् ।

पाक्दै गरेको र काटिनसकेको धानलाई खासै समस्या नभएपनि काटेर राखेको धानलाई अब मौसम खुलेपछि घाममा सुकाएर भित्र्याउन धानबाली विज्ञको सल्लाह छ ।

अहिले परेको पानीले धानमात्रै होइन, तोरी, दलहनबाली र आलुलगायतका बालीमा पनि असर पुर्याएको छ । धान काटेर तोरी, दलहनबाली र आलु लगाउने समय भएकाले यो वर्षाले असर पारेको छ ।